வல்வையூரான் 1

செவ்வாய், 1 அக்டோபர், 2013

காகித எழுதி.

தேர்ந்த கவி ஒருவனின்

கைகளில் சிக்கிக்கொண்ட

காகித எழுதி

கன வேகமாக நிரப்பிக்கொண்டிருந்தது

காகிதத்தின் வெற்றிடங்களை

கனமான பொருளோடு...

சிறந்த சிந்தனாச் சிப்பியின்

கைகளில் சிக்கிய

சிறிய தூரிகை

கிறுக்கிய

அகண்ட நெடிய

ஓவியத்தைப்போல்

நிறைத்து வழிந்தன

கவிதைகள்

வெற்றிடத்தில் இருந்து

வெற்றிடத்தைப் பற்றியதாக...

சூனியத்தில் இருந்து

வெறுமையில் இருந்து

பிறந்துகொண்டிருந்தது

பெருமைகளின் சிந்தனை

பிரசவிக்கும் தாயின்

முக்கலும் முனகலும் இல்லாமலே

பிரசவித்துக்கொண்டிருந்தது

காகித எழுதி

கவிதையை

நியாங்களில் இருந்து

நிஜங்களில் இருந்து

வெறுமையை

நிரம்பிக்கொண்டு

பிறந்துகொண்டிருந்தது

அந்தக் கவிதை

தேன் நிறைந்த பூவின்

வாசமாக

கிறங்க வைத்தன

வெற்றிடத்தைப் பற்றி

வெறும் காகிதத்தில்

நிரம்பிக்கொண்டிருந்த

வித்தக கவி

கவிதை

சுவைக்க வந்தோர்
பூரணையில் மதுவருந்தி
களிக்கும் தேனிகளையொத்த
களிப்புடனே
பருகினர்
சுவைத்தனர்

சுவைத்தவர்

நிறைத்தனர்

தம் மன வெற்றிடத்தை;

வெறுமையே மிஞ்சியது

தேர்ந்த கவிக்கு

பிரசவ தாதியாய்

தன்னை மீண்டும்

தயார் படுத்திக்கொண்டது

ஓர் காகிதம்

காகித எழுதியின்

புதிய பிரசவிப்புக்காய்

தேர்ந்த கவியின்

கைகளில் மீண்டும் சிக்கியது

காகித எழுதி...

வல்வையூரான்.

திங்கள், 23 செப்டம்பர், 2013

ஹைக்கூக்கள் 22

பெற்றதாகச் சொல்லப்பட்டாலும்
இன்னும் கிடைக்கவில்லை
யாருக்கும் சுதந்திரம்.

இறக்கையடித்துப் பறந்தது
கூண்டுக்குள் கிளி
சுதந்திரமாய்(...?)

மீட்டப்பட்டுக்கொண்டிருந்தது வீணை
தூங்கிக்கொண்டிருந்தது
குழந்தை.

மாறிக்கொண்டன
மாற்றிக்கொண்டனர்
இதய மோதிரங்களை.

சேமித்துக்கொண்டிருக்கிறேன்
தூக்கத்தை
வெளிநாட்டு வாழ்க்கை

கூண்டுப்பறவைக்கு விடுதலையாம்
திறக்கப்பட்டது கூண்டு
சிறகுகள் வெட்டப்பட்டிருந்தன.

இறக்கை வெட்டிய கிளிக்கு
திறந்து விட்ட கூண்டு
சுதந்திரம்.

பல லட்சங்கள் செலவில்
இலவச கழிவறை
பறவைகளுக்கு சிலைகள்.

உயிரை உறிஞ்சி குடித்துக்கொண்டிருக்கிறாய்
நிறுத்திக்கொள் விடிகிறது
உன் விளையாட்டு ஊடலை

வல்வையூரான்.

செவ்வாய், 10 செப்டம்பர், 2013

ஹைக்கூக்கள் 21.

துளையிடப்பட்டது புல்லாங்குழல்
வாசித்துக்கொண்டிருந்தவன்
வலியை மறந்தான்.

வயதானாலும்
வாலிபத்தோடு தொடர்கின்றன
வலிமையான நட்புக்கள்.

புலரும் பொழுதுகள்
வெறுமையாக
அருகில் நீ இல்லை

இறுக்கி அணைத்து முத்தமிட்டாய்
வலித்தது எனக்கு
அந்த பூனையாக நான் இல்லையே

சவாரியில் பாய்தன மாடுகள்
இறந்தது
ஜீவகாருண்யம்

காடழித்து பயிரிட்டவர்கள்
காத்திருக்கின்றனர்
மழைக்காக.

கூட்டத்தில் அலறிக்கொண்டிருந்தது ஒலிபெருக்கி,
பேச்சாளர் பேசிக்கொண்டிருந்தார்
ஒலிமாசு பற்றி

தினமும்
தூங்கிக்கொண்டிருக்கிறேன்
நில(னை)வோடு

வல்வையூரான்.

செவ்வாய், 3 செப்டம்பர், 2013

எழுத்தாளர்கள் என்று
ஒரு காலம் இருந்தவர்கள் சிலரே
அந்த முறையகற்றி
வலை வழியாக
வந்த கருத்தெல்லாம் பதிந்து
நிலையாக அதனை
நிமிடதே பகிர்ந்து
நிலையுலகம் சுற்றியோர்
வலைப்பதிவர்கள்.

ஓரோரிடத்தில் நின்றோரை
ஓரிடத்தழைத்து
ஓரண்டுக்கு முன்னே
திருவிழாக் கண்டனர்
அது முதலாம் வலைபதிவர் திருவிழா

இன்று
சிங்காரச் சென்னை தனிலே
சிந்தை மகிழ்ந்தோர் எல்லாம்
சித்தம் குளிர குழுமினர்
ஆடினார் பாடினர்
ஆரவாரம் செய்தே
ஆலிங்கனம் செய்தனர்
இது இரண்டாம் வலைபதிவர் திருவிழா

அந்த சந்தோசம்
நேரில் எனக்கில்லை
இருக்கட்டும்
இன்னொரு திருநாளில்
யான் காண்பேன் இன்முகங்களை

இன்றைய தினத்திலும்
இருக்குதாம் ஒரு வழி
தொ(ல்)லை பேசி வழியாக
தொலைவிலிருந்தே
எல்லையில்லா ஆனந்தத்துடன்
உங்கள் எல்லையில் வந்து
உரைக்கின்றேன் வாழ்த்துக்கள் கோடி.

வளமான உங்கள் இல்லை எங்கள் விழா
வான் புகழ் கொண்டு சிறக்கட்டும்

ஒலிக்கட்டும் பதிவர்கள் குரல்
ஓங்கட்டும் பதிவர்கள் புகழ்.

(குறிப்பு: இந்த கவிதை எழுதப்பட்டது கனடா நேரம் இரவு 2.30(01.09.2013). ஆனால் காலை 5.00 மணிவரை ஆர்வத்தோடு காலையில் வேலை இருந்தும் முழித்திருந்து மூன்று முறை தொடர்புகள் எடுத்தும் அங்கிருந்த சிலருடன் பேச முடிந்ததே அல்லாமல் விழாவில் படிக்க முடியவில்லை என்பது சோகமே...)

வல்வையூரான்.

சனி, 31 ஆகஸ்ட், 2013

ஹைக்கூக்கள் 20

அகரத்திலும்
முதலாய் நின்றது
அம்மா.

குழந்தையைக் கொஞ்சி மகிழ்ந்துகொண்டிருந்தான் அவசரமாக
முடிந்துகொண்டிருந்தது
விவாகரத்து அனுமதித்த வாரத்துக்கான குழந்தை பார்க்கும் நேரம்.

பரவுகின்றது ஒளிவெள்ளம்
அடிபட்டுப் போகின்றன
பல இருள்கள்.

தனித்திருந்தன இரட்டைப்பனை
தொலைத்திருந்தன
தூரதேசத்தில் உறவுகளை.

குடிக்கையில்
குழம்பியது
அவள் மனதே.

பறந்துகொண்டிருந்தது கொடி
விரட்டிக்கொண்டிருந்தது
காற்று.

பதிவர் சந்திப்புக்கு வாழ்த்து

சென்னையில் நடைபெறுகின்ற வலைப்பதிவர்கள் மாநாட்டில் நாங்கள் நேரில் கலந்து கொள்ளவில்லை, முடியவில்லை எனினும் எங்கள் உள்ளங்களால் கலந்து அந்த நிகழ்ச்சி சிறப்புற அமைய வேண்டும் என இந்த பதிவின் வழி வாழ்த்துக்களைக் கூறிக்கொள்கின்றோம். சந்தர்ப்பம் அமையும் போது நாங்களும் கலந்து சிறப்பிப்போம்...

நிகழ்ச்சி சகல முறையிலும் சகலரும் சந்தோசப்படும் வகையிலும் அமைய எங்கள் வாழ்த்துக்கள்.

வல்வையூரான்.