ஹைக்கூகள் 8

மலரே மலர்களுள் தேடினேன் கொடுப்பதற்கு 

கிடைக்கவில்லை 

உன்போன்ற அழகான மலர்.

கடையடியில் புகைந்தது அணைந்தது 

தெரு முனையில் 

நீ.

மரணம் கூட மகிழ்வாய் தெரிந்தது 

என் மனதில் 

மட்டுமே நீ ...

வந்த களைப்பு பறந்தது

கண்டேன்

காத்திருந்த உன்னை.

கடிகாரம் நிற்பதேயில்லை

நின்றிருந்தது

அவள் பக்கம் இருக்கையில்

வல்வையூரான் 

	Tweet

தமிழ் காத்து வாழ்வோம்

தமிழ் அழகு மொழி - அறிவு
சிறந்தோர் உதித்த மொழி

தமிழுக்கு அழகு ழகரம் - அந்த 

தமிழ் இன்று இழந்தது பல 

நாடு இழந்தோம்
நகரிழந்தோம்
தன்னிகரிலா உறவுகளை இழந்தோம்
தங்கி வந்த நாட்டில்
தமிழில் எங்கள் பேரிழந்தோம்
இத்தனையிலும் பெருமையும் கொண்டோம்
இது எங்கள் சிறுமைதானே

தமிழன் நாம் பலர்
பேசுவது தங்கிலிஸ்
பேசுவது தங்கிலிஸனாலும்
அதிலும் பெருமை கொள்ளும்
சிற்றரிவினர் எம்மில் பலர்

லகரமும் ழகரமும் றகரமும்  ரகரமும்
எம்மில் பலருக்கு
சரியாக வருதில்லையாம்

தமிழை காதலி
தமிழுக்காக வாழ்ந்து பார்
அழகு தமிழ் உன்னோடு கொஞ்சும்

தமிழன் என்று சொல்வது பெருமை
தலை நிமிர்ந்து நிற்பது பெருமை
தமிழ் காத்து வாழ்வோம்
தலை வகுத்த வழி நிற்போம்.

வல்வையூரான் 

	Tweet

இதயங்களில் ஏற்றிய பெருநெருப்பு

தடுமாற்றங்களும்
குழப்பங்களும்
நிறைந்த மன நிலை
நாம் என்ன செய்ய

2009
உலகமே சேர்ந்து
குழப்பியது எம்மை
குவிந்தது தாயகத்தில்
பிணங்களின் குவியல்

கந்தக புகை நிறைந்தது எங்கும்
நச்சு புகையும் சேர்ந்தே இருந்தது
இலங்கையில் ஓரினம்
இன்னோரினத்தின் முகவரி பறித்தது
பார்த்தது சர்வதேசம்
சதியில் ஐநாவும் பங்கெடுத்தது

உரிமைக் குடி ஒன்றின்
உரிமை மறுப்பை
உலகம் பார்த்தது
உரத்து அறிக்கை விட்டன
சில நாடுகள்
சிறிலங்கா செய்ததை
சரி என்று!!!

துன்னாலைப் பிறந்தவன்
லண்டன் நகர் வசித்தவன்
மூவொன்பதாண்டு வயதுளான்
முருகதாசெனும் பெயருளான்
மூண்ட சினம் கொண்டான்
உலகுக்கு உண்மை நிலை
புகன்றிட வந்தான்.

ஏழு பக்கத்தில்
எழுதி முடித்தான்
மரண சாசனம்
உண்மைக்காய்
உயிர்தரும் தமிழன்
முருகதாசன் என்று
ஒப்பமுமிட்டான்

சுதந்திரக் கதவு
ஒருநாள் திறக்குமென்றான்
துறந்தான் தன்னுயிர்
ஈந்தான் தன்னுடல்
சுதந்திர தீயில்

ஜெனிவாவில் ஐநா சபை
அதிர்ந்தாலும்
அலட்டிக்கொள்ளவில்லை
இன்றுவரை

இன்னவன் இழப்புக்கு
சர்வதேசமே
நீ ஒருநாள்
பதில் சொல்லியே
ஆக வேண்டும்

எரிந்தவன்
வாழ்கின்றான்
எம் இதயங்களில்
ஏற்றிய பெருநெருப்பாய்

வல்வையூரான்

	Tweet

ஹைக்கூக்கள் 7

மலர்களும் வெட்கி தலைகுனிந்தன

அவை கண்டது

உந்தன் மலர்முகம்.

தனிமையில் முழுநிலவும் தகிக்கிறது

திருடிப்போனாய் 

தண்மையெல்லாம்.

நேற்றுப்போலவே இன்றும் இனிக்கிறது

உன் நினைவுகள்

காதல்.

அவள் திறந்து பார்த்தது

கடிதமல்ல 

என் இதயம்.

தூங்கும் போதும் 

விழித்தே இருந்தது

இடம்மாறிய மனசு.

முட்கள் குத்திய போதும்

வலிக்கவில்லை - அது

காதல்.

வல்வையூரான்.

	Tweet

பொங்கலோ பொங்கல்...

நாங்கள் பொங்குவோம்
பொங்கலோ பொங்கல்...
பொங்கலோ பொங்கல்...

கல்லு மூண்டு வச்ச அடுப்பில
கனதியான புது மண் பானை வச்சு
முக்குறிகளை  முழுசா அதற்கு வச்சு
பக்கத்தில கட்டோட கரும்பு வச்சு

புது நெல்லு மணி விளக்கி
பசும்பாலும் நெய்யும் மனமா விட்டு
பக்குவமா சக்கரை கலந்து
பதமாக வெந்து வர
முந்திரி வத்தலும் முந்திரிப்பருப்பும்
ஏலத்தூளும் தூவி
பொங்கல் பொங்கி வர
வெடி சுட்டு
பொங்கலோ பொங்கல் எண்டு
பாட்டி குலவையிட
பக்கத்துக்கு வீட்டிலும்
முன் வீட்டிலும் கூட
வெடியோசை வானைப் பிளத்தது
பொங்கலோ பொங்கல்...
பொங்கலோ பொங்கல்...

இது
முன்பொரு காலம்.

ஆனால் இப்ப

முன் வீட்டு குடும்பம் இன்னும்
முகாம்ல இருந்து வரயில்ல
முள்ளு கம்பிக்குள்ள
முழுசா அடைபட்டு இருக்கினம்

ஆனாலும் எங்களுக்கென்ன
நாங்கள் பொங்குவோம்
பொங்கலோ பொங்கல்...
பொங்கலோ பொங்கல்...

பக்கத்துக்கு விட்டில இருந்த
பரமசிவத்தார்ட பெடியன்
வன்னில இருந்து வரயிக்கை
வழியில காணாமல் போனவன்
இன்னும் வீடு வரயில்ல


ஆனாலும் எங்களுக்கென்ன
நாங்கள் பொங்குவோம்
பொங்கலோ பொங்கல்...
பொங்கலோ பொங்கல்...

விதானையார் வினாசித்தம்பி வீட்டில
ரெண்டு நாள் முன்னால
விறுக்கேண்டு வந்த
வெள்ளை வானால வில்லங்கம் ...
விதானையார்ட மனிசி அழுதா...


ஆனாலும் எங்களுக்கென்ன
நாங்கள் பொங்குவோம்
பொங்கலோ பொங்கல்...
பொங்கலோ பொங்கல்...

தெரு முனையில
இருக்கிற சின்னையா விட்டில
படிக்க எண்டு
பல்கலைக்கழகம் போன
பரந்தாமன் திரும்பி வார வழியில
படக்கெண்டு மறிச்சவங்கள்...
பிடிச்சு போனவங்கள்...
இன்னும் விடயில்ல


ஆனாலும் எங்களுக்கென்ன
நாங்கள் பொங்குவோம்
பொங்கலோ பொங்கல்...
பொங்கலோ பொங்கல்...

இப்படி தினமும் 

எத்தனையோ நடக்குது

இங்கேயும் அங்கேயும் நடக்குது

இரவும் பகலும் நடக்குது  

ஆனாலும் எங்களுக்கென்ன
நாங்கள் பொங்குவோம்
பொங்கலோ பொங்கல்...

பொங்கலோ பொங்கல்...

வல்வையூரான்.

	Tweet

ஹைக்கூக்கள் 6

விளக்குகளும் மங்கிபோகும்

விந்தை விடியல்

காதல்

தினமும் கிழிக்கப்படுவது

கடதாசிகள் அல்ல

உன் ஆயுள்

விழி அம்பெறிகையில்

விபத்துக்குள்ளானது

விழுந்தவன் இதயம்

மயங்கியது மனது

மகிழ்ச்சியில்

இசை.

பலமான ஆயுதம் தான் பெண்களிடம்

ஆண்களுக்கேதிராய்

மௌனம்.

கடலலை எழுந்து எட்டாண்டு

இன்றும் கடல்வெள்ளம்

கண்களில் ஆழிப்பேரலை.

பொங்கி எழுந்ததால்

மங்கியது வாழ்வு

சுனாமி.

தடக்கி விழுகையில் பிடிப்பதும்

தள்ளி விடுவதும்

நட்பே.

வீடுகளில் செக்கலென்றால் அழுகை

விருந்தேதும் தெரிவதில்லை கண்ணில்

விசித்திரம் - தொலைக்காட்சி நாடகங்கள்.

வல்வையூரான் . 

	Tweet

புதுவருடம்

விடை ஒன்று கொடுத்து 
புதியதை வரவேற்று
விண்ணுக்கும் மண்ணுக்கும் 
துள்ளினர் ஒருபால்


வித விதமாக,
விழிகளை உயத்த வைத்த
விலை கொண்ட 
ஆடையர் ஒருபால்

கடிகார முள்ளை
கன நேரமுற்று
காத்திருந்து கையிலிருந்த
வெடிதனை வெடித்தோர் ஒருபால்

பெடிகளாய் நின்று
கும்மி குத்தி
பெண்கள் பக்கம் திரும்பி
இளித்தவர் ஒருபால்

கைகள் வலிக்க வலிக்க
கஷ்டம் பார்க்காமல்
கனகதியில் SMS
அனுப்பினர் ஒருபால்

லட்டு ஜிலேபி என்று
பட்சணங்கள் உண்டு
பக்கத்துக்கு வீட்டுக்கு தந்து
பறை சாற்றியோர் ஒருபால்

பீர் ஒரு கையில்
பிகர் ஒரு கையில் என்று
பின்விளைவுகள் அறியாது
சுத்தினர் ஒருபால்.

தேரடி வீதியிலும்
திரும்பிய திசைகளிலும் 
சந்தோசம் கொப்பளிக்க
இருந்தனர் இவர்கள்

ஊரது ஒதுங்கிய இடத்தில்
ஒலைக்குடிசைக்குள்ளே 
ஒன்றிலும் லயிக்காது 
ஒதுங்கி இருந்தவன் ஏழை.

வல்வையூரான்.

	Tweet